KALIBO, Aklan—Nagtau eon it bulig ro Department of Social Welfare and Development ukon DSWD region VI sa mga apektadong pamilya angot sa natabu nga oil spill nga naka-abot eon sa kaeawran nga sakop it Caluya, Antique.
Raya hay matapos ro pag-eugdang it MT Princess Empress nga kargado it industrial nga langis sa Naujan, Mindoro ko Pebrero 28.
Suno kay Judith Tanate-Barredo-OIC Division Chief Disaster Response Management Division it DSWD-Field Office 6 nga nakapanupod eon sigon it ayuda sa idaeum it assistance to individuals in crisis situation nga nagabalor it 3,000 pesos kada pamilya, emergency cash transfer nga 5,070 pesos kada pamilya ag may cash for work sa mga pamilyang kaeabanan hay mga mangingisda nga eubus nga naapektuhan it pagkalhit it langis.
Pagasweldohan ro mga raya it 450 pesos nga minimum nga sweldo kada adlaw sa region 6 sa sueod it 15 diyas sa paglimpyo it mga nagtagas nga langis.
Naga-abot eon sigon sa kapin sa 4,599,900 pesos ro na-distribute nga bulig pinansiyal para sa 570 nga apektadong pamilya.
Padayun suno kana ro distribusyon kara sa kapin sa 7,047 nga nabillin nga benepisyaryong pamilya nga may pondo nga masobra sa 26 milyon pesos.
Sa kabilugan hay 7,670 nga pamilya ro natumod nga apektado sa ap-at nga barangays sa banwa it Caluya.
Matapos ro natabu nga oil spill hay nagpanupod eagi sanda it food packs nga nag-abot sa 3,200 sa Semirara.
Magadere-deretso suno kana ro pagpadaea it dugang nga food packs eabi eon sa mga isla agud nga indi magutman ro mga residente sa bulig it Philippine Coast Guard.
Madumduman nga nauna eon nga ginpaidaeum sa state of calamity ro nasambit nga banwa.
