Kalibo Aklan ———–Nadugangan pa it 27 ro mga eskuwelahan nga nagpartisipar sa ginapatigayon nga expansion it limited face-to-face classes sa bilog nga probinsya it Aklan.
Raya hay matapos nga makapasar sa ginhimo nga validation it regional office it Department of Education (DepEd).
Suno kay Dr. Miguel ‘Mac’ Apusin, Schools Division Superintendent it DepEd-Aklan nga sa nasambitan nga numero, 24 kara ro maghalin sa pampublikong eskuwelahan samtang 3 hay sa pribadong eskuwelahan.
Bangud kara hay naga-abot eun sa 10 porsiyento ro mga eskuwelahan nga nagpatigayon it limited face-to-face classes sa bilog nga probinsya.
Samtang, maabo pa sigon ro mga eskuwelahan nga naka line-up ag nagahueat eun lang nga makapasar sa validation agud nga makapartisipar man sa limited face-to-face classes.
Sa pihak nga parte, ginpahayag man ni Dr. Apusin nga suspendido ro mga klase sa Kinder hasta Grade 12 sa bilog nga Pilipinas umpisa Mayo 2 hasta 13 ukon sa sueod it haeos katunga it buean it Mayo bangud sa 2022 national and local elections.
Dugang pa kara nga apisar nga sa ika-9 it Mayo pa ro aktwal nga botohan, masami nga nagagamit it mga classroom it eskuwelahan bilang voting precinct.
Apang, kinahangean sa gihapon suno kana nga magsueod sa eskwelahan ro mga manugturo sa nasambitan nga petsa apisar sa adlaw nga owa sanda it ubrahon kapareho it botohan.
