NATIONAL News — Nagpaandam ro mga awtoridad sa The Hague, Netherlands kontra sa pagtililipon it mga tagasuporta ni dating Pangueong Rodrigo Duterte.
Raya hay matapos ro gina-alegar nga pauman-uman nga pag-eabag it mga raya sa local regulations angot sa andang pagtililipon sa guwa it International Criminal Court (ICC).
Nasayuran nga sangka grupo it mga tagasuporta it dating pangueo ro nag-`picnic’ para iselebrar ro ika-80 nga kaadlawan ni Duterte.
Ginhambaean sigon sanda nga magpabilin eang sa sangka lugar sa guwa it ICC apang nataeupangdan sigon it Dutch police nga nag-eampas ro mga raya hasta sa bicycle lanes rason nga naakig ro mga awtoridad sa lugar kamana man ro mga Dutch cyclist.
Suno kay Joel Vega, sangka Pinoy nga naging Dutch citizen, ginakabig nga “sagrado” ro bicycle lanes sa Netherlands nga indi puwedeng baeabagan it ibang tawo.
Maabung tagasuporta ni Duterte ro nag-abot sa nasambit nga pagtililipon para sa anang kaadlawan kun sa siin may ibang naghalin pa sa Norway ag Germany para ipakita ro andang pagpalangga sa dating pangueo.
Nag-abot man sanday dating presidential spokesperson Harry Roque ag Senador Robin Padilla.
Ginklaru man it mga awtoridad nga ro gintau nga permit hay para sa `picnic’ ag bukon it sangka pagtililipon nga may kaangtanan sa politika.
Nagpaandam ro Dutch police nga posibleng pamultahon ukon papanaugan it nagakaigo nga aksyon ro grupo it mga Duterte supporters kon magapadayun sanda sa owa pagsunod sa local regulations.
