BANGA, Aklan — Naninahan ag padayun nga gina-obserbahan sa ospital ro sangka eaeaki matapos nga bun-on it naka-away nga igkampod samtang naga-inuman sa sangka baraka sa Brgy. Daja Norte, Banga, bandang alas-10:50 it gabi-i it Martes.
Nakilaea ro biktima nga si Dante David, sa legal nga edad ag residente it nasambit nga lugar .
Insigida raya nga gindaea sa Aklan Provincial Hospital pagkatapos nga mabun-an it suspek nga tinamaan sa anang kilid it eawas.
Suno kay P/Capt. Dandy Gonzalodo, hepe it Banga Municipal Police Station nga parehong hilong ro biktima ag suspek kat matabu ro insidente.
Ginasugid nga hapon pa eamang hay naga-inuman eon ro daywa ag kat nabitin hay nagsaylo sa sangka baraka.
Ro suspek hay boluntaryo nga nagsurender bandang alas-6:00 pagka-aga sa andang punong barangay kaibahan ro sanggot nga gingamit sa krimen.
Suno kana nga gin-awat eamang nana ro anang igkampod bangud nga naka-inom, magulo ag nagasinggitan nga nakaka-disturbo eon sa katueugon it mga residente sa lugar.
Nagatueur-an makaron ro magtimbang nga parte kon sin-o ro nagapanag-iya it sanggot.
Base pa sa imbestigasyon it kapulisan, ginpahayag it biktima nga mabuhay eon sanda nga may owa pagka-ilintindihan nga mag-igkampod.
Bangud kara, pursigido nga magpasaka it kasong frustrated homicide ro asawa it biktima.
Natukiban nga ro suspek hay dati eon nga nakulong bangud sa kasong RA 10591 ukon illegal possession of firearms.
Nagapadayun pa ro imbestigasyon it kapulisan sa insidente.
P/Capt. Dandy Gonzalodo, hepe it Banga Municipal Police Station
