KALIBO, Aklan–Magapangatubang sa kasong murder ro sangka eaeaki matapos nga ginbaril-patay ro anang igbata pasado alas-10:00 kabi-i sa Brgy. Bulabod, Malinao.
Suno kay P/Capt. Gilbert Batiles, hepe it Malinao Municipal Police Station nga pinaagi sa bulig it mga barangay official hay naaresto ro suspek nga si Renato Quinesio, apang owa narekober ro baril nga gingamit sa krimen.
Samtang, dead on arrival sa Aklan Provincial Hospital ro biktimang si Eduard Quinesio tuga it tatlong igo it bala sa anang dughan.
Base sa imbestigasyon it kapulisan, samtang nagapungko ro biktima sa sueod it andang baeay ag nakikipag-inuman kaibahan ro anang ina hay gulpi eamang nga nagsaka ro suspek nga gina-alegar nga una sa impluwensiya it aeak ag ginbaril it makapilang beses ro biktima.
Ginasugid nga bukon it ro mismong biktima ro naka away it suspek kundi ro anang tiyo ag igmanghud.
Ginapatihan nga bangud sa owa pagka-ilintindihan it magpamilya tuga it away sa eugta ro pinaka-ugat it krimen.
Nasayuran nga ro suspek hay dati eon nga napresu sa New Bilibid Prison matapos nga makapatay, apang nakahilway matapos nga taw-an it amnestiya.
Apang balik-kulungan raya makaron sa lock-up cell it Malinao PNP.
Sa pihak nga parte, ginkumpirma ni punong barangay Rosario Dela Cruz it Bulabud, Malinao nga ko Marso 3 it makaron nga dag-on hay nagpa-blotter sa andang taeatapan ro ina it biktima kontra sa suspek nga gina-alegar nga nagpukan it puno it kahoy sa eugta nga andang nasakupan kamana man nga gintutukan it baril.
Gindugang pa ni kapitan Dela Cruz nga maabu sanda nga mga na-encounter nga reklamo angot sa away sa eugta kun sa siin ginalaygayan eon lang nanda ro mga raya nga magdangop sa Department of Agrarian Reform sa pagresolba sa ginasangagan nga dueunan.
