Nasapwan ng nagapaligos sa anang kaugalingon nga dugo ro sangka eaeaki una mismo sa andang panimaeay nga gina’alegar nga gin’eapog it bato it anang kapit baeay alas-11:25 it gabei ku Mayo 30 sa Brgy. Estancia, Kalibo.
Suno kay P/Major Willian Aguirre, deputy chief of police it Kalibo Municipal Police Station nasayuran nga matapos mag’inom hay gingubat it biktima ro suspek samtang may daea ng ispading.
Bilang reaksyon hay gin’eapog sigon ku suspek it bato ro biktima nga tinama sa anang mata nga nagresulta sa pagkalipong ag black eye.
Mismo man nga suspek sigon ro nagpangayo it bulig ag insigida nga gintawgan it Municipal Disaster Risk Reduction Management ag gindaea sa provincial hospital.
Paathag it suspek nga kada makainom ro biktima hay pirme sigon ruyon nagapang’ayat it away.
Sa makaron, una sa kustodiya it Kalibo MPS ro suspek ag magapangatubang it nagakaigo nga kaso, pahayag man it suspek nga sabton nana ro medical bills it biktima.
Padumdom ni P/Major Aguirre nga iagi sa mayad nga istorya ro mga indi pagkaeasugot ukon idangop sa barangay council.
