MALINAO, Aklan—Makataliwan ro haeos limang buean, nadakpan ro sangka eaeaking wanted sa pagbaril-patay sa anang kasimaryo sa anang naging hideout sa probinsiya it Antique.
Ginserbi ro warrat of arrest sa suspek nga si Ricky Rapiz, sa legal nga edad ag residente it Brgy. Kinalangay Nuevo, Malinao nga wanted sa kasong homicide.
Gin-aresto imaw sa ginpatigayon nga operasyon it Malinao Municipal Police Station ko Sabado nga adlaw, Nobyembre 16 matapos makumpirma nga idtu raya nagapanago sa San Andres , Pandan, Antique .
Ginpahayag ni P/Lt. Alnie Fontenilla, Deputy Chief of Police it Malinao MPS nga bandang alas-9 it gabi-i it ko Hunyo 13, 2024 kat matabu ro pagbaril it suspek sa biktimang si Darius Zaspa, 38-anyos, residente man it nasambit nga lugar matapos nga magbakae raya sa baraka it igmanghud ni Rapiz.
Nagapa-uli eon kunta ro biktima kat ginbaril it suspek nga tinamaan sa nagkaeain-eain nga parte it eawas.
Nadaea pa raya sa ospital apang gindeklarang dead on arrival it nagtatap nga doktor.
Matapos ro pagpamaril hay nagpaeagiw ro suspek .
Sa pihak nga parte, ginasugid nga owa eon nagsukoe ro suspek sa mga kapulisan kat imaw hay gin-aresto.
Ginasugid nga bangud sa dating banggi-anay ro pinaka-motibo sa krimen.
Samtang, nakataeana nga iga turn-over sa korte nga natungdan ro suspek para sa nagakaigo nga disposisyon.
Kaibahan sa most wanted persons list it Malinao MPS ro nadakpan nga suspek nga nagpamalibad eon nga magtau it pahayag.
