BALITANG Espesyal —- Base sa Limca Book of Records, ro 21-anyos nga si K Praveen it Tamil Nadu ro posibleng magapanag-iya it may pinakamahabang dila sa bilog nga kalibutan sa sukat nga 4.2 inches!
Kilaea sa andang banwa sa Virudhunagar si Praveen bangud sa mahaba nana nga dila.
Pirme nana nga ginapakita sa mga amigo ag igbata nga masarangan nana nga dilaan ro punta it anang ilong .
Mag-eowas kara, madali man para kana nga dilaan ro anang siko.
May pagtuon nga ginpatigayon kato ro orthodontics department sa University of Edinburgh ag natukiban nanda nga ro ordinaryong haba it dila it sangka tawo hay 3.3 inches.
Kun pagabasehan ro nasambit nga research, mas mahaba it 1 inch ro dila ni K Praveen ag posibleng imaw ro may pinakamahabang dila sa bilog nga kalibutan.
Ro presenteng record holder it “World’s Longest Tongue” sa Guinness Book of World Records hay si Nick Stoeberl it U.S nga may habang 3.9 inches.
Gustuhon man ni Praveen nga kilaeahon imaw it Guinness bilang may pinakamahabang dila, indi nana masarangan ro gastos agud nga mag-imbita it Guinness World Record official adjudicator para sukaton ro anang dila.
Bangud sa application fee pa eang, naga-abot eon it $800 dollars ro kinahangean nga gastuson .
Sa makaron, kuntento eon si Praveen nga naeakip imaw sa Limca Book of Records, ro Indian counterpart it Guinness World Records.
