KALIBO, Aklan — NAKAKULONG eon sa Kalibo Municipal Police Station ro 27-anyos nga eaeaking ginaturo nga sa likod it mga bomb threat sa pilang eskwelahan sa banwa it Kalibo.
Naaresto ro suspek, residente it Barangay Tagas, Tangalan, Aklan, it mga tawuhan it Kalibo MPS sa gahum it warrant of arrest, adlaw it Huwebes, Agosto 13, 2026.
Madumduman nga nauna eon nga naserbihan ro suspek it Warrant to Search, Seize and Examine Computer Data ukon WSSECD. Sa ginpatigayon nga imbestigasyon, natumod sigon nga imaw ro nagapanag-iya it cellphone nga gingamit sa pagpadaea it mga bomb threat.
Gintaeana it korte sa P72,000 ro piyansa para sa temporaryong kahilwayan it suspek. Sa makaron, nagapabilin imaw nga nakakulong sa detention facility it Kalibo MPS samtang ginahueat ro masunod nga proseso it korte.
