Ginakabig nga sangka milagro ro nasaksihan it mga doktor sa England kat natawo ro owa nagaginhawa ag owa it heartbeat nga eapsag.
Apang makataliwan ro 17 minutos nga pag-resucitate sa baby, nabuhi raya.
Base sa report, ginasugid nga pagapunduhon eon kunta it mga doktor ro pag-resucitate kay Baby Isaiah Gordon, kat gulpi raya nga makaangkon it kabuhi.
Antes kara, 26 weeks eon nga nabdos ukon masobra sa an-um nga buean si Bethany Homar kat gulpi imaw nga gin dugo ag gindaea sa ospital.
Suno sa pag-usisa, nakaangkon si Homar it placental abruption, ukon nagbueag sa anang uterus ro placenta, nga imaw ro nagatau it kabuhi sa eapsag sa tiyan it ina.
Nagdesisyon si Homar nga magpaidaeum sa C-Section agud nga taw-an it kahigayunan nga mabuhi ro anang eapsag.
Ag makataliwan ro 17 minutos nga resucitation, gulping nagginhawa ag nagpitik ro tagipusuon it eapsag .
Insigidang gindaea sa neonatal ICU si Baby Isaiah Gordon, nga kinahangean nga matayunan eagi it dugo .
May buho man ro tagipusuon ni Baby Isaiah, rason nga ginpahayag it mga doktor nga mabahoe ro posibilidad nga indi man imaw mabuhi.
Apang matapos ro 100 adlaw sa ospital, nagpadayun ro pagmayad it kondisyon it eapsag ag natigayon eon sanda nga maka-uli sa baeay.
Nakakabit sa gihapon ro oxygen kay Baby Isaiah, apang manami ro naging resulta it anang brain scan.
Apang kinahangean sa gihapon nga bantayan si Baby Isaiah bangud sa kondisyon it anang tagipusuon ag baga ag sa naging epekto it kawad-an it oxygen sa anang utok kat natawo imaw nga owa it kabuhi.
Sa pihak kara, kumpiyansa ro mga ginikanan ni Baby Isaiah nga kun nasarangan it andang unga nga eampasan ro kawad-an it heartbeat, owa sanda it pagsubok nga indi masarangan
