KALIBO, Aklan—Ginaeauman nga magiging three-cornered fight ro engkwentruhanay sa pagka-kongresista sa unang distrito it probinsiya it Aklan sa maabot nga 2025 midterm elections.
Apang suno kay dating sangguniang panlalawigan member ag political analysts nga si Atty. Harry Sucgang nga medyu guwa eon sa listahan si USWAG partylist Rep. Jojo Ang.
Matunog man ro pangaean nga magapadaeagan sa nasambit nga posisyon sanday Kalibo Mayor Juris Sucro ag unga ni 1st district congressman Carlito Marquez nga si Jess Marquez.
Nauna kara, nagatuhaw sa ginpatigayon nga survey nga gina-alegar nga ginmandu ni Aklan 2nd district congressman Ted Haresco nga close fight ro engkwentruhanay it tatlo, apang nagapangibabaw ro pangaean ni Mayor Haresco.
Ginpahayag ni Atty. Sucgang nga ambisyon gid man ni Mayor Sucro ro congressional position ag makabig nga accidental eamang ro anang pagpadaeagan bilang alkalde bangud nga owa eon sanda it mabo-oe nga kandidato.
Maeapit man sigon sa kamatuoran ro resulta it survey bangud sa kasikatan makaron ni Mayor Sucro.
Sa pihak nga parte, nagapati si atty sucang nga imposibleng bangga-on ni Congressman Ted Haresco ro anang gumankon nga si governor Joen Miraflores sa maabot nga eleksyon.
Suno kana nga posibleng may ginatago gihapon imaw nga personal nga kaakig kay Congressman Marquez kamana man sa Sangguniang Panlalawigan sa pagpanguna ni Vice Governor Reynaldo Quimpo bangud sa mga natabu ko nagtaliwan.
Posible sigon nga pagatapuson ni Cong. Haresco ro anang termino ag magabutang it bise gobernador nga anang pagasuportahan.
