Sangka public school sa United Kingdom ro temporaryo nga nagsuspende it klase matapos nagdaea it granada ro sangka estudyante para sa classroom activity nga “Show and Tell”.
Ro insidente hay natabo sa Osmaston Church of England Primary School sa Ashbourne, Derbyshire.
Base sa report, sangka unga nga eaeaki ro nagpaguwa it granada nga halin pa ko tiempo it World War II samtang ginapatigayon ro nasambit nga classroom activity.
Ro “Show and Tell” hay sangka classroom activity kun sa siin ginapadaea ro mga estudyante it sangka bagay halin sa andang baeay ag ipaathag kara sa atubang it klase bilang kaparte it paghanas sa paghambae ag pag-share it andang personal nga experience.
Suno sa head teacher nga si Jeanette Hart, insigida nana nga ginbo-oe ro granada sa alima it unga ag ginbutang sa likod it sangka mabahoe nga puno sa parking lot samtang ginahueat ro pag-abot it mga otoridad.
Nakipag-angot eagi raya sa mga pulis ag nagtawag it bomb disposal unit agud tsekyaron ro granada.
Matapos ro maid-id nga pag-usisa gamit ro X-ray equipment, ginkumpirma it military bomb experts nga bukon eon it aktibo ro granada ag owa eon it ikasarang nga mag-eupok pa.
Apang gindayaw it mga otoridad ro madasig nga aksyon it mga manugturo agud masiguro ro kaeuwasan it mga estudyante.
Sa report it lokal nga pulisya it Matlock, ginpaabot nanda nga dapat mangin mausisa ro mga ginikanan sa mga bagay nga ginadaea it andang mga unga sa eskwelahan.
Suno kay Hart, owa it maeain nga intensiyon ro unga ag owa raya nakasayod sa peligro nga daea it nasambit nga Granada.
