KALIBO, Aklan—Haeos inde makapati si Atty. Ronifelle Barrios it Brgy. New Buswang, Kalibo nga sa unang kahigayunan nga pagbueo it Bar Examination hay makapasa eagi imaw.
Suno kana, aminado imaw sa anang kaugalingon nga ginhimo nana ro tanan apang ro eubus nga pagsalig sa Diyos ro ginapatihan nga naging susi sa anang pagkaeakip sa 2,103 nga pumasa sa 2019 Bar Examination halin sa 7,685 nga aspirants.
Ginpahayag dugang nga mabahoe nga sakripisyo ro anang ginhimo para eamang maabot ro handom nga maging abogado ag bukon it hangae ro anang inagyan pag-abot sa pagtuon.
Apang, bilang aklanon hay maisog nana nga gin-atubang ro tanan nga sab-eag ag problema kon sa siin makaron hay nabaton eon nana ro bunga it anang pinangabudlayan.
May kaangtanan kara, eubus nana nga ginpasaeamatan ro bilog nga pamilya bangud maskin maeayo sigon ro mga raya hay uwa imaw ginakalipatan ag ginaeakip imaw it tanan sa pangamuyo.
Si Atty. Barrios hay nag-eskwela it elementarya sa Aklan Learning Center; nagsekondarya sa Regional Science High School for Region VI; nagkolehiyo sa West Visayas State University sa syudad it Iloilo sa kurso nga AB political Science ag nagtapos sa anang pagka-abogasiya sa San Beda College.
