Nag-umpisa eon ro plano para ma-evacuate ro ginatos nga mga barko ag masobra sa 11,000 seafarers nga presenteng stranded sa Gulf region kasunod it ceasefire sa tunga it Iran ag Estados Unidos.
Suno sa International Maritime Organization (IMO) it United Nations, nakikipag-angot eon sanda sa mga barkong una sa lugar agud nga umpisahan ro eowas nga pag-eayag paguwa it Strait of Hormuz.
Ginpasiguro man it IMO, nga eowas ro pagahimuon nga evacuation para sa mga stranded nga barko ag tripulante sa rehiyon.
Pagahiwaton ro maeapnagon nga operation sa pakikipagbueuligan it Iran, Oman, Estados Unidos, ag iba pang kompanya.
Suno man sa Ministry of Defense it Oman, nakataeanang pagahimuon ro evacuation sa sangka phased ukon amat-amat nga pag-rescue agud nga malikawan ro pagbueungguan sa nasambit nga kadagatan.
Sa makaron hay indi anay pagagamiton ro Traffic Separation Scheme ukon ro nagapangunang shipping route sa Strait of Hormuz. Sa baylo, daywang ruta anay sa naaminhan ag nabagatnan it nasambit nga aeagyan ro pagagamiton para sa eowas nga pagsaylo it mga barko.
Ro Traffic Separation Scheme hay gintaeana it International Maritime Organization ko 1968 agud nga ayuson ro daeagan it mga barkong naga-agi sa tunga it mga kadagatan it Iran ag Oman sa Strait of Hormuz.
