Ginpaguwa eun it Department of Agriculture ro Final Bulletin parte sa El Nino Phenomenon nga unang nagpanaeasa sa bilog nga nasyon ku ulihing bahin it 2023 hasta sa unang bahin it 2024.
Base sa Final Bulletin, nag-abot sa P15.30 billion ro ginakabig nga danyos sa kabilugan nga pagtuhaw it El Niño kun siin naapektuhan ro kabilugan nga 333,195 nga mga mangunguma ag mangingisda.
Umabot man sa 270,855 hectares it mga agricultural areas ro nakitaan it kasamaran, samtang ro production loss hay nag-abot sa kabilugan nga 784,344 MT.
Raya hay ginabilog it 330,717 Metric Tons (MT) nga paeay, 327,310 MT nga mais, 112,681 MT it mga high value crop, ag 2,320 MT it cassava o kamoteng kahoy.
Sa mga paeayan, nagaabot sa 109,481 ektarya ro naapektuhan halin sa kabilugan nga natamnan eun 2,137,046.77 hectares.
Sa mga maisan man, nag-abot sa 131,787 hectares ro ginakabig nga naapektuhan.
Raya hay katumbas it 11.96% nga natamnan eun 1,101,695.90 hectares.
Suno sa DA, nakaapekto ro El Niño sa kabilugan nga target production it Pilipinas sa tanan nga industriya.
Nakabutang sa report it ahensiya nga nahimo kara nga makapaguwa it hasta P14.54 billion nga bulig para sa mga naapektuhan nga mangingisda ag mangunguma.
Sa idaeom it nasambitan nga haega P 8.59 billion hay naghalin sa Rice Farmers Financial Assistance (RFFA), P4.72 billion ro paagi sa production support sa paagi it mga regional offices kara, P659.17 million hay paagi sa mga inputs ag ro habilin hay paagi sa crop insurance, loan, ginpanao nga kasapatan ag iba pa.
