KALIBO, Aklan—Kabilugan nga naging madinaeag-on ro ginpatigayon nga free concert bilang kaparte it selebrasyon it kaadlawan ni Kalibo mayor Juris Sucro nga gintambungan it libo-libong katawo nga ginhiwat sa Jetty Port sa Brgy. Pook, Kalibo.
Suno kay Police Major Willian Aguirre, deputy OIC chief of police it Kalibo Municipal Police Station nga naging madinaeag-on man ro ginlatag nga security preparation and implementation sa pagpatuman it seguridad ag kaeowasan it libo-libong katawo nga nakisadya sa okasyon it alkalde.
May mga nailistang nalipong apang gilayon man ro mga raya nga nataw-an it medikasyon it nakastandby nga emergency response unit it Kalibo Municipal Disaster Risk Reduction Management Office.
Nasayuran nga mag-eowas sa banda nga ginpangunahan ni Rico Blanco hay presente man sa event ro komedyante nga si Long Mijia, mga aktor nga sanday Kristoffer Martin, Vin Abrenica, Julian Trono ag si Ella Cruz.
Mag-eowas sa free concert hay nagparaffle man it mga appliances, bugas, motor ag saeakyan bilang grand prize nga napasaalima it sangka traysikol driver nga si Dindo Prada it Brgy. Old Buswang, Kalibo.
