KALIBO, Aklan—Bagsak ro ginta-o nga rating it Gabriela Women’s Party sa naging State of the Nation Address ukon SONA ni Pangueong Ferdinand Marcos Jr.
Suno kay Gabriela partylist representative Arlene Brosas nga puro pagbida ro ginpanghambae it chief executive bangud nga hasta sa makaron hay uwa nabatyagan it pumueoyo ro pagbag-o sa idaeom it anang liderato.
Sa baylo, uwa it ginhimo nga intervention ro gobyerno agud nga mapanaba ro mga nagapangunang baeak-eon sa merkado.
Ginaeauman kunta nanda nga mabatian ro angot sa pagta-o it bastante nga sweldo sa mga trabahante nga makabulig sa andang pagpangabuhi apang maskin raya uwa gid nasambit sa SONA it president.
Substantial nga sweldo para sa mga minimum wage increase ro kinahang-ean agud nga mapaumwad ro pagpangabuhi it kada isaea apang ginadingot pa raya it gobyerno.
Dismayado man si representative Brosas sa iba pang ginbida it gobyerno eabi eon ro angot sa mga hoarders ag smugglers nga uwa gid it napanabat maskin sambilog.
Sa pihak kara, ginkwestyon man nana kon siin hasta makaabot ro food stamp program it gobyerno nga sambilog sa mga ginbida ni Marcos ag ro angot sa health package it Philhealth nga maabo gihapon ro mga nagakinahang-ean it financial para sa pagpabueong nanda sa mga ospital.
