KALIBO, Aklan—Bukon it pabor si Malay mayor Frolibar Bautista sa gindihon nga resolusyon it Sangguniang Bayan it Malay nga ipaidaeum sa temporaryong lockdown ro andang border.
Ginduso it mga SB members ro tikang kasunod it pagka-alarma sa nailistang kauna-unahan nga kaso it local transmission sa probinsiya.
Nakabaehag sa resolution no. 149 nga kinahangean nga maging alerto ag mapagbantay ro lokal nga gobyerno it Malay agud nga maprotektahann ro turismo ag ekonomiya it banwa.
Gindugang pa ni mayor Bautista nga medyu mabudlay ro ginarekomenda it SB nga isarado ro border sa Buruanga ag Nabas bangud nga maabu kara ro maapektuhan eabi eon ro mga may negosyo ag importanteng transaksyon.
Dapat suno kana nga kon siin eamang nakalista it positibong kaso hay dikara eamang magpatuman it lockdown.
Owa it rason suno kana agud nga mag-panic basta nga ginasunod eamang ro guidelines it World Health Organization ag Department of Health.
Madumduman nga gindeklara it Provincial Health Office nga nakaangkon eon it local transmission matapos nga mag positibo sa virus ro sangka babayeng staff it molecular laboratory it Aklan provincial hospital.
Natapnan kara ro 6 nga iba pang katrabaho nga puro naka-quarantine makaron sa Brgy. Old Buswang, Kalibo.
Sa makaron ro isla it Boracay hay bukas eon para sa mga turistang nagahalin sa Western Visayas.
