KALIBO, Aklan—Ginpaabot it mga hog raisers ukon mga naga-alaga it baboy sa probinsiya it Aklan nga owa sanda it plano nga magpundo sa pagbaligya kundi nga magapatong it price ceiling nga P150 kada kilo it buhi nga baboy agud nga malikawan ro pagkalugi.
Suno kay Engr. Jun Agravante, chairman it livestock sector it provincial agriculture and fishery council sa probinsiya it Aklan nga base sa andang computation, kapin sa P135 hasta P150 ro kada kilo makaron it buhi nga baboy apang ro baligya it karne sa mga baealigyaan hay naga-abot sa P260 hasta P270 kada kilo kun sa siin dapat hay may gap eamang nga P80 to P100.
Kaeabanan suno kana nga ro nagadikta it presyo hay ro mga trader ukon buyer.
Nasayuran nga umpisa makaron nga adlaw it Biyernes hay nagpatuman it hog raisers strike ro mga manugbaboy sa Iloilo sa sueod it daywang domingo.
Gindugang pa kara nga plano man kunta nanda nga makisabay agud nga maipabatyag ro andang kaakig apang naisip nanda nga kon eubusan nga magpundo sa pagbaligya hay mas pang maga-lobo ro presyo sa merkado bangud sa kakueangan it supply.
Samtang, problema man sigon nanda ro nagatinaas nga presyo it feeds nga naga abot eon makaron sa masobra sa P1,700 kada sako.
