Uman nga ginpamaeabagan it pila sa mga mataas nga miyembro it gabinete nga uwa nakipag-buligan ro gobyerno it Pilipinas sa International Criminal Court sa pag-aresto kay dating Pangueong Rodrigo Roa Duterte.
Sa pag-atubang ni Justice Secretary Jesus Crispin Remulla sa ginhimong pagpamati it Senate Committee on Foreign Relations kahapon, nagpanindugan ro opisyal nga uwa it hurisdiksyon ro ICC sa Pilipinas bilang sangka sovereign state.
Suno kay Remulla, sa pihak kara hay may una man nga hurisdiksyon ro ICC sa mga indibidwal nga may ginapangatubang nga kaso nga sueod sa International Humanitarian Law. Buot-hambaeon may obligasyon ro Pilipinas nga sumunod sa idaeom it International Humanitarian Law para i-surrender ro gindibidwal nga akusado.
Partikular man nga gintumod it opisyal ro pagsunod it gobyerno sa Republic Act 9851 kun siin hay ginahambae it laye ngara nga kinahangean i-atubang ro sangka akusado sa International Tribunal para bistahon.
Maging si Defense Secretary Gibo Teodoro ag National Security Adviser Eduardo Año hay ginpamilit nga uwa sanda nakipagbuligan ukon umasiste man eamang sa ginpatigayon nga imbestigasyon it International Cour.
Ginpamalibaran man ni DILG Secretary Jonvic Remulla nga uwa it grand conspiracy sa pag-aresto kay FPRRD sa pihak it anang naging unang pahayag sa sangka interview nga bilog nga grupo ro kaibahan nanda sa pagplano.
