Eubus ro kalipay it gobyerno probinsyal it Aklan matapos nga ginkilaea bilang Most Competitive Province sa bilog nga Western Visayas sa ginpatigayon nga 6th Regional CMCI Awards for Competitive LGUs nga gin-organisa it National Economic Development Authority ag Department of Trade and Industry.
Kadungan sa pagkilaea sa probinsya hay ginrekognisa man ro pito ka mga kabanwahan sa nasambit nga award nga ginakaeakipan it Kalibo, Malay, Tangalan, Ibajay, Nabas, Lezo ag Makato.
Angot kara, malipayon nga ginbaton ni Philippine Councilors League ukon PCL Aklan president Rolly Equiña ro pagkilaea in behalf sa pagpamuno ni Aklan governor Joen Miraflores ag pumueoyo it Aklan.
Ginpaabot nana ro kalipay nga nabatyagan it probinsya sa award nga nabaton.
Samtang sa pihak nga parte, ginpahayag ni Ma. Carmen Ituralde, provincial director it DTI Aklan nga ro Cities and Municipalities Competetiveness Index (CMCI) hay sangka dag-unang ranking it mga siyudad ag munisipalidad sa nasyon nga ginhimo it National Competitiveness Council pinaagi sa Regional Competitiveness Committees (RCCs) ag sa bulig man it United States Agency for Internal Development.
Sa raya nga tikang sigon hay napamatud-an it mga LGU’s officials ro pagiging resilience sa pakikipagbuligan it pumueoyo.
Senyales man sigon raya nga naeampuwasan ro pandemya nga nagpanaeasa it haeos daywang dag-on
