Nag-abot sa sang dag-on ag tunga eon ginapaminsaran it grupo nanday Teddy Casiño, ro chairman it Bagong Alyansang Makabayan ro pagpasaka it kaso kontra sa mga hosts it SMNI nga sanday Jeffrey “Ka Eric” Celiz ag Lorraine badoy.
Suno kana, mahimo man nana nga depensahan ro mga saea nga akusasyon nanday badoy ag Celiz kontra kana.
Ginagamit sigon ni Casiño ro ana nga mga social media accounts kamana it facebook ag twitter para sabton ro mga saea nga akusasyon ag alegasyon.
Apang suno kana nga kon adlaw-adlaw sigon nanda nga gina-obra ag may mabahoe man nga network sanday Badoy ag Celiz, indi sigon nana mahimo sabton ro kaabuon nga mga akusasyon nga ginahaboy kana.
Gina-amplify man raya it mga trolls rason nga kinahangean eon nana mag-ubra it paagi agud sanda hay mapundo ag mapanabat.
Paathag pa ni Casiño nga nag-abot it pilang buean ro andang pagtipon it mga ebidensya kontra sa daywang host it SMNI bangud gina-take down sigon ro YouTube channel ag Facebook page it nasambit nga network.
Nasayuran nga makapilang beses eon nga gin-take down ro mga social media accounts it SMNI kamana it YouTube kon sa siin naga-obra sanda it panibag-ong channel.
Suno kay Casiño, mismo ro YouTube ag Facebook ro nagahambae nga nagabayolar sanda sa community standards apang ro gina-obra sigon it nasambit nga network hay ro pag-obra it panibag-ong channel.
Paathag pa ni Casiño nga kon ma-take down sigon ro mga social media accounts it SMNI hay nagaduea man ro mga file ag link kara rason kinangean nanda raya nga ma-trace.
Madumduman nga nagpasaka it kaso si Casiño kontra sa mga host it SMNI nga sanday Jeffrey Celiz ag Lorraine Badoy nga nagaeabag sa Civil Code Sections 19, 20 ag 21.
Ginasamaran sigon it daywang host it SMNI si Casiño ag gina-akusahan it saea nga mga akusayon nga nakasamad it ana nga reputasyon ag pagbutang it anang segurisad sa peligro.
Paathag pa ni Casiño nga owa it basehan ro tanan nga akusasyon nanday Celiz ag badoy kontra kana.
Maskin sambilog sigon nga ebidensya hay uwa sanda ginpakita apang pauman-uman nanda raya ginapahayag umpisa pa ko dag-on 2022.
