KALIBO, Aklan—Owa naila nga mag-speculate si dating Kalibo Mayor ag Gubernatorial aspirant William Lachica angot sa plano it andang mga kapartido sa ibabaw partikular ro andang kandidato sa pagka-presidente nga si Ferdinand ‘Bong-bong’ Marcos Jr.
Suno kana nga engkaso nga makaangkon it mga pagbag-o hay nagaeaum imaw nga raya hay para sa kamaeayran.
Angot kara, ginlaygayan ni Lachica ro publiko nga maghueat kon ano ro posible pang matabu sa pilang mga inadlaw nga nabilin antes ro nobyembre 15 nga imaw ro deadline it election substitution.
Nasayuran nga ko Martes hay nagtuga it nagkaeain-eain nga espekulasyon ro pag-atras ni Davao City Mayor Sara Duterte-Carpio sa anang kandidatura sa reelection kara bilang mayor.
Kaibahan eon kara ro posibleng alyansa ni Marcos ag Duterte-Carpio.
Sa pihak kara, ginpasiguro ni Lachica nga nagapabilin nga establi ro andang grupo sa aklan ag ginaeauman nga owa eon it pagbag-o ro andang desisyon eabi eon ro nag-file it certificate of candidacy ukon COC.
