KALIBO, Aklan—Sa baylo nga “no-helmet policy”, ginaduso makaron it provincial board ro pagpasa it tikang nga maga-regulate sa pag-gamit it helmet sa mga motorcycle riders agud nga matapna ro motorcycle-riding criminals sa probinsiya it Aklan partikular sa mga highly urbanized area ukon mga matawo nga lugar.
Suno kay 1st district board member Nemesio Neron, chairman it committee on peace and order nga raya ro andang natalakay sa ginpatigayon nga inquiry angot sa owa pa naresolba nga mga kaso it pagpamatay it riding in tandem sa probinsiya.
Kinahangean suno kana nga obligahon ro mga riders nga boe-on ro andang mga suksok nga helmets kon magbiyahe sa mga matawo nga lugar bangud nga imposible man sanda nga makapadaeagan it madasig kun sa siin tuyo kara nga maitsurahan sanda kon nagahimo it mga krimen.
Ro nasambit nga tikang hay naka-pending pa makaron sa sangguniang panlalawigan.
Igasuhestiyon man sigon nana sa natungdan nga mga komite nga ro kada local government units ukon LGU’s sa Aklan hay maghimo it ordinansa nga magabawae sa paggamit it mga bonnet ag tinted helmets ag magbakae it mga dekalibre nga klase it closed circuit television ukon CCTV cameras nga makabulig sa imbestigasyon it awtoridad.
Nasayuran nga ro inquiry hay gintambungan ni Aklan Police Provincial Director P/Col. Victorino Romanillos Jr., kaibahan ro hepe it nagkaeain-eain nga municipal police stations sa Aklan, kamana man ro hepe it Land Transportation Office nga si Engr. Marlon Velez ag iba pang natungdan nga ahensiya it gobyerno.
Nagpanindugan ro LTO head nga sandig sa national law, required ro tanan nga motorcycle riders, eakip ro driver ag back rider kara nga magsuksok it standard nga protective motorcycle helmets samtang nga nagabiyahe.
Sakop man sigon it laye ro parehong long ukon short distance nga pagbiyahe sa anuman nga klase it daeanon ag highway sa nasyon.
