Nagpaandam si International Criminal Court (ICC) President Tomoko Akane it Japan kontra sa posibleng paghina it pangkalibutanong rule of law matapos raya nga imponeran it sanctions it Estados Unidos.
Kaibahan ni Akane nga ginpaidaeom sa sanctions si ICC trial lawyer Abdoulaye Seye it Senegal.
Kaibahan sa epekto it mga penalidad ro pagbawae sa andang pagsueod sa US ag paggamit it financial system it nasyon.
Suno kay Akane, ginaeauman eon nana ro nasambit nga tikang apang importante nga bukon raya it magiging rason it paghina it pangkalibutanong sistema it laye.
Ginpahayag mat-a it ICC nga ro sanctions hay pag-atake sa andang kahilwayan.
Ro tikang it Washington hay kaparte it tikang it kampanya it administrasyong Trump kontra sa ICC, nga ginaakusahan nga sangka tiwali ag pulitikal nga institusyon.
Kaibahan sa mga naunang tikang it US ro sanctions kontra sa iba pang opisyal it korte, nga ginaangot sa mga imbestigasyon it ICC nga may kaangtanan sa Israel.
