Ginpasugtan it International Criminal Court (ICC) ro hinyo it kampo ni dating Pangueong Rodrigo Duterte nga magdugang it sangka indibidwal sa anang listahan it non-privileged contacts samtang una sa kustodiya.
Sa desisyong ginpaguwa ku Hunyo 11, ginamnduan man it hukuman ro Registry nga ireport ro anumang pageabag sa contact restrictions ag iba pang konektado nga isyu.
Suno sa ruling, ginpasugtan ro limitadong komunikasyon matapos matumod nga uwa eon ginakinahangean ro dating pagbawae, sandig sa naga-iral nga kondisyon it ICC ag kinamatarong pantawo it sangka detainee.
Uwa it pagbaeabag halin sa prosekusyon ag Registry sa nasambit nga hinyo, samtang uwa it ginsumiteng obserbasyon ro mga representante it mga biktima.
Ginpalig-on man it ICC ro pagpadayon it contact restrictions nga may pilang pagbag-o, samtang nakataeana ro pag-umpisa it pagbista kay Duterte sa Nobyembre 30, 2026.
