Ginsibak eon sa puwesto si International Criminal Court (ICC) Prosecutor Karim Khan matapos desisyonan it kaabuan sa mga miyembrong nasyon it korte pabor sa anang pagpatalsik.
Base sa report it Reuters, 82 sa 125 miyembrong estado it ICC ro nagsuporta sa desisyon kasunod it mga alegasyon it sexual misconduct nga may kaangtanan sa sangka junior staff member it korte.
Hugut man nga ginpamalibaran ni Khan ro mga pasibangud kontra kana. Suno sa anang mga abogado, owa it bastante nga ebidensya ro ginapasibangud kontra kana ag owa man sigon naging patas ro naging proseso it pagpamati sa kaso.
Kasunod it pagpahalin kana, maga-umpisa ro proseso it pagpili it bag-ong ICC prosecutor. Sa pihak kara, ginaeauman nga sa masunod nga dag-on pa makaangkon it kabaylo si Khan.
Samtang, nagapabilin nga ginapatuman ro tanan nga mga presenteng arrest warrants nga ginpaguwa it ICC, bangud nga ro mga hukom eamang it korte ro may gahum nga bawion ro mga raya.
Kadungan kara, uman nga gin-insister it Estados Unidos ro pagkontra kara sa ICC.
Sa pagbisita sa Pilipinas ni U.S. Secretary of State Marco Rubio, ginpahayag nana nga maskin hin-uno hay indi maga-atubang sa pagbista it ICC ro mga opisyal it Estados Unidos.
Bukon man it miyembro it ICC ro U.S. ag mabuhay eon kara nga gina-kwestiyon ro gahum it nasambit nga International Court.
