KALIBO, Aklan—Pwedeng magpatigayon it imbestigasyon ro International Criminal Court ukon ICC sa naging kampanya kontra iligal nga droga it nagtaliwan nga Duterte administration.
Raya ro ginpahayag ni Atty. John Mar Barrios, sangka kilaeang abogado sa probinsiya it Aklan matapos nga aprubahan it ICC ro uman nga pagbukas it imbestigasyon sa kontrobersiyal nga “war on drugs.”
Ginpahayag dugang nga ro pagahimuon nga independent investigation hay base sa international law nga kaparte it charter it united nations.
Nakadepende sigon sa presenteng administrasyon kon igakonsidera ro findings it ICC ag magapasaka it kaugalingon nga kaso.
Bilang sangka independent nga nasyon, gin-insister ni Atty. Barrios nga owa it sin-o man ro pwedeng magdikta sa anuman naton nga pagahimuon nga desisyon.
May kaugalingon sigon nga justice system ro nasyon rason nga kinahangean nga iya pagabistahon ukon pagapamatian ro kasong igapasaka kontra kay Duterte.
Sa opisyal nga record it war on drugs ni Duterte, kapin sa 6,181 nga katawo ro namatay.
Apang para sa rights group, posibleng naga-abot pa sa 30,000 ro napatay kun sa siin kaabuan hay mga inosente.
