Padayun nga ginatumod it mga awtoridad ro identity ukon pagkatawo it bangkay it sangka eaeaki nga nakit-an nga una eon sa state of decomposition sa bibi it baybay sa Brgy. Fatima, New Washington, agahon it Martes, Marso 10.
Ro biktima hay nakasuksok it long sleeve nga light blue nga may naka-print nga pangaean nga “Antonio Aira Councilor” sa likod ag naka-shorts it itom.
Ginpahayag ni Punong Barangay Reneboy Custodio it nasambit nga lugar nga sangka residente ro nakakita sa bangkay nga nakahapa sa ubos it seawall, kun sa siin insigida man raya nga nagdangop sa andang barangay council nga imaw ro nagtawag sa kapulisan ag Municipal Disaster Risk Reduction and Management Office ukon MDRRMO-New Washington.
Sa pihak nga parte, suno man kay John Wilben Luna it MDRRMO-New Washington nga ginaboeobanta nga una eon sa ap-at hasta sa limang adlaw nga nakababad ro bangkay sa tubi.
Sa pag-usisa it mga awtoridad, owa it napabalitang missing sa probinsiya it aklan mag-eowas sa bangkero nga napabalita nga aksidenteng nahueog sa suba nga sakop it Brgy. Calacabian, Libacao , gabi-i it Lunes sa kasagsagan it mabaskog nga bubu it uean.
Nakikipag angot eon makaron ro kapulisan sa kaiping nga mga probinsiya kon may nairecord sanda nga mga missing person.
Ro bangkay hay presenteng sa kustodiya it sangka funeal parlor.
