KALIBO, Aklan — Sambilog eon man nga paeag it pagpasabog ro nabaton it Aklan State University partikular sa andang Ibajay Campus.
Suno kay Dr. Jeffrey Clarin, ASU president nga aga-aga it Martes, Enero 27 hay ginpadaehan imaw it andang campus director it mensahe angot sa nabaton nga bomb threat.
Bangud kara, uman nga nagkansela it klase bilang pagsunod sa protocol.
Insigida man nga nagpatigayon it ocular inspection ro mga kapulisan sa nasambit nga unibersidad ag makataliwan ro pilang oras hay gindeklara nga safe ro campus ag negatibo sa pampasabog.
Dugang pa ni Dr. Clarin nga nasubuan sanda sa mga nagakatabu sa unibersidad bangud nga nakakasagabal raya sa pag-tuon ag trabaho.
Angot kara, plano nanda nga magpadaea it sueat sa provincial director it Aklan Police Provincial Office agud nga maistoryahan ro nasambit nga problema eabi pa ag hasta sa makaron hay owa pa it resulta ro ginpatigayon nga imbestigasyon sa mga nauna nga mga nabaton nga bomb threat partikular sa Banga ag Kalibo campus nga nagresulta man sa kanselasyon it klase ag trabaho .
Nagaeaum si Dr. Clarin nga makabilog ro kapulisan it sangka unified framework kaibahan ro iba pang natungdan nga ahensiya it gobyerno para mapabaskog ag insigida nga matumod kun sin-o ro nagapadaea it mga mensahe.
Samtang, owa imaw nagapati nga sangka tawo eamang ro may kahimuan it magkasunod nga bomb threat.
Hasta sa makaron hay owa pa it lead ro mga awtoridad kun sin-o ro nagapadaea it mga mensahe eabi pa ag madiskarte ro mga suspek nga nagagamit it dummy account.
