KALIBO, Aklan—Ginpahayag nga naging madinaeag-on ro ginpatigayon nga re-supply mission ag ro paglatag it bouya sa teritoryo it West Philippine Sea nga ginpangunahan it Atin Ito Coalition.
Suno kay Jay-ar Arante, Head it LGU-Kalibo media team halin sa pantalan sa Botolan, Zambales, sakay sa ap-at nga commercial vessel, nag-umpisa sanda nga mag-eayag kaina it agahon kaibahan ro kapin sa 100 nga mga volunteers kaeakip si Kalibo Mayor Juris Sucro ag mga katapo it local media.
Kapin sa 100 nga fishing boat man ro nag-convoy sa caravan, apang nagbalik sa pangpang pag-abot sa lugar kun sa siin medyu mabaskog eon ro humbak bangud nga indi masarangan it mga raya ro current it tubi.
Ro convoy hay gin-ibhan it Philippine Coast Guard.
Tatlo ro katuyuan it caravan kun sa siin nagapanguna kara nga maipakita ro hilway nga pagparada sa ginakabig nga Exclusive Economic Zone, pagbutang it mga boya nga may nakabutang nga “WPS is ours” nga nagaserbing symbolic markers sa EEZ it nasyon ag magtau it bulig sa mga Pilipinong mangingisda kapareho it mga pagkaon ag krudo.
Gusto eamang sigon nga ipaabot it grupo nga maibalik sa dati ro patakaran nga hilway nga maka-eayag sa West Philippine Sea ro mga Pilipino partikular ro mga mangingisda eabi eon sa scarborough shoal.
Antes ro pag-eayag hay nakaangkon anay it briefing sa mga nagsunod sa ginpatigayon nga misyon ag ginplastar ro mga dapat nga obrahon.
Gindugang pa nga naga-isaeahanon eamang si mayor Sucro sa mga local officials nga nagsunod sa misyon.
Nasayuran nga raya eon ro ikaywang civilian mission nga ginpatigayon it Atin Ito.
Ginpatigayon ro byahe paagto sa Scarborough Shoal, haeos daywang domingo ro nakataliwan matapos nga bombahan it water cannon it Chinese coast guard ro daywang baroto it Pilipinas sa nasambit nga lugar.
Ro Scarborough Shoal hay nahamtang sa 240 kilometros ukon 150 miles sa west it Luzon samtang 900 kilometros man halin sa Hainan nga isla it China.
Raya hay nagakahueugan nga mas mabaskog ro ebidensya it Pilipinas nga ang mga Pinoy ro nagapanag-iya it nasambit nga teritoryo, ag suportado it international ruling.
