KALIBO, Aklan—Ginaeauman nga eubus nga maapektuhan it El Niño phenomenon hay ro ikaywang distrito it probinsiya it Aklan.
Raya ro ginpahayag ni sangguniang panlalawigan member ag chairman it committee on agriculture nga si Nemesio Neron.
Suno kana nga sa ginpatigayon nga regular session may ap-at nga buean eon ro nagtaliwan hay ginapanan-aw nga kapin sa 788 nga ektarya it kaeanasan sa ikaywang distrito hay indi matamnan it paeay bangud sa kakueangan it tubi halin sa irigasyon.
Raya hay amat-amat eon suno kana nga nababatyagan bangud nga nagakahubas eon ro tubi sa Aklan river nga imaw ro water source it irrigation system sa probinsiya.
Pila sigon sa naging suhestiyon kato it mga natungdan nga ahensiya it gobyerno nga gin imbitahan sa session partikular it National Irrigation Administration ag Department of Agriculture ro pag-angkon it water impounding area ag ro pag-divert it pagtanum sa root crops nga owa masyadong nagakinahangean it tubi.
Angot kara, ginpasiguro ni Neron nga nagahimo eon it nagakaigo nga tikang ro mga natungdan nga ahensiya it gobyerno agud nga mapahagan hagan ro posibleng negatibong epekto it El Niño phenomenon sa probinsiya.
