May mga local government units nga nagaplano eon nga haeugaan ro pagsuksok it face mask sa andang lugar.
Kon sa guwa it building ukon sa park, gustong boluntaryo eon lang ro pagsuksok it face mask.
Ro nasambit nga plano hay nagahatud eon man it koeba bangud nga nagpaandam ro OCTA Research Group nga posibleng magtaas ro mga kaso it COVID-19 sa National Capital Region (NCR) sa masunod nga buean.
Suno kay Dr. Guido David, nakalista it mataas nga 17.5% nga positivity rate sa NCR.
Ginpahayag ni David nga posibleng mag-abot sa 2,000 kada adlaw ro kaso it COVID.
Suno man sa pag-analisa it Department of Health , halin sa 14.2% ko Setyembre 14, nagsaka raya sa 17.5% ko Setyembre 21.
Mataas sigon raya sa 5% benchmark it World Health Organization.
Samtang, ginpahayag man it WHO representative sa Pilipinas nga bukon pa it tiempo agud nga ideklarang tapos eon ro pandemya sa nasyon .
Ro pahayag hay gin-obra kasunod it mga paghaeuga sa pagsuksok it face masks.
Unang naghaeuga ro Cebu City sa pagsuksok it face masks sa pihak it pag-oponer it DOH.
Posibleng mag abu pa ro LGUs nga magapatuman it paghaeuga ukon eubusan eon nga boe-on ro pagsuksok it face masks.
Ginarason man nanda tuyo kara nga maka-engganyo it mga turista sa andang lugar.
Kaabuan sa mga dumueuong hay owa eon naila nga magsuksok it face mask.
Nagalikaw sigon ro mga dumueuong ukon turista sa mga lugar nga hugut nga nagapatuman it pagsuksok it face mask.
Sa makarondaya nga sitwasyon nga maabu eon ro nagaplano nga magbo-oe it face mask, dapat nga ipabilin sa mga eskuwelahan ro pagsuksok kara.
Delikado kon obrahon nga voluntary sa eskwelahan.
Posibleng dikara makaangkon it pagtaeapnan eabi pa ag bukon it manami ro bentilasyon sa mga eskwelahan.
Nagatiyog-tiyog eang ro hangin ag kun owa it face mask ro estudyante, mahanggop nanda ro virus.
Maabu ro matapnan bangud ro mga estudyante hay owa pa it bakuna ag booster shots.
Maskin ro mga manugturo hay owa gihapon it booster shots.
Kun ro iba hay nagamadali sa pagbo-oe it face masks, indi raya dapat nga obrahon sa mga eskwelahan.
Isipon ro kaeowasan it mga unga sa eskwelahan .
