KALIBO, Aklan — Bangud sa pag-eabag sa Forestry Code, ginkasuhan it National Bureau of Investigation (NBI) Task Force Boracay sa Department of Justice ro pilang resorts sa isla kaibahan ro hotel nga ginapanag-iyahan it ingkampod ni dating Pangueong Benigno “Noynoy” Aquino.
Nagapangatubang makaron sa nasambitang kaso ro mga executives it Playa Asya Resort Inc., affiliate it Gorgeous Holdings Incorporated.
Ginpangaeanan ro mga respondents nga sanday Ramon O. Cojuangco Jr., presidente it Playa Asya nga nagadumaea sa Asya Boracay ag Asya Premier Suites.
Nasayuran nga second cousin imaw ni dating Pangueong Noynoy Aquino; kamana man sanday Maria Theresa E. Cojuangco, treasurer ag director it Playa Asya; Arturo B. Diago, treasurer it Gorgerous Holdings; ag Ma. Auxiliadora E. Co, director ag stockholder it Playa Asya ag Gorgeous Holdings.
Sa pihak nga parte, kaparehong kaso man ro gindihon it NBI Task Force Boracay sa SkyGarden De Boracay sa Barangay Balabag kaibahan ro mga opisyal nga sanday Philip L. Chua, Marilyn S. Wong, Fernando A. Soriano, ag Chinese nationals nga sanday Yong Wan ag Lijuan Wan; ag ro Kingfisher’s Farm, nga ginapanag-iyahan it architect nga si Lara Arac-Salaver, sa Barangay Manoc-Manoc, Boracay.
Ginpahayag nga iligal nga gin-okupa it nasambitang mga establisimento ro forest lands ag nagpatindog pa it mga edipisyo nga sangka pag-eabag sa laye.
Nauna eon kara nga ginpahayag ni acting Prosecutor General Richard Anthony Fadullon nga nakataeanang umpisahan ro preliminary investigation sa kaso.
