KALIBO, Aklan—Ginkondena it lokal nga gobyerno it Malay, Aklan ro iresponsableng pagsueod sa isla it Boracay it sambilog sa mga tawuhan it Bureau of Fire Protection (BFP) region VI nga ko ulihi hay nasayuran nga positibo sa Coronavirus Infectious Disease o Covid-19.
Sa official statement nga ginpaguwa it LGU Malay, ginhambae ni acting mayor Frolibar Bautista nga nagkonsulta eon sigon imaw sa Municipal Legal Office para sa nagakaigong kaso nga posibleng ipasaka kay Western Visayas patient 144 nga sangka 26 anyos nga babaye sa pag-eabag kara sa quarantine protocols.
Kaangot kara, nagapatigayon eon sigon it contact tracing ag imbestigasyon ro Municipal Health Office, Municipal Tourism Office, ag Malay Police Station.
Nataeopangdan ro sangkiri nga tawo nga nagasueod sa isla sa unang adlaw nga ginbuksan raya sa lokal nga turista.
Sa pihak kara, ginduea it alkalde ro kabaeaka it mga pumueoyo ag padayon nga gin-engganyo ro mga taga-Western Visayas nga magbakasyon matapos nga pormal eon nga ginbuksan ro isla sa publiko.
Nauna eon nga gin-insister it alkalde nga magapadayon ro pagbukas it Boracay para sa mga domestic tourist sa pihak nga naeosutan sanda it frontliner nga positibo sa nasambit nga sakit.
