KALIBO, Aklan—Eubus nga nagakalisod ro mga negosyante it isda kasunod it nagkalhit nga saea nga impormasyon halin sa narumpag nga mga pantyon sa sementeryo nga nahamtang sa binit it baybayon it Barangay Aguila, Sebaste sa probinsya it Antique.
Mabahoe ro naging epekto kara sa mga negosyante sa probinsya it Aklan bangud nga ginpatihan it kaabuan nga ro mga isda nga ginabaligya hay nakakaon it patay nga tawo maghalin sa mga pantyon nga tinamaan it storm surge ko nagtaliwan nga dominggo daea it epekto it habagat ag mga nagtaliwan nga bagyo.
Suno kay Punong Barangay Leovigildo Villanueva it Barangay Dumga, Makato nga mabahoe nga kalugihan sa andang bahin ro natabo bangud sa ginapatihan nga saea nga impormasyon.
Eubus nga apektado ro tagsa ka pamilya nga nagasalig sa pagbaligya it isda bangud nga pilang dominggo nga mahina ro baligyaan it isda maskin sa merkado publiko sa banwa it Kalibo.
Gin-ako ni Villanueva nga may supply it isda maghalin sa Pandan, Antique apang ginklaro kara nga sa eawod ginadakop ro isda ag uwa nagakaon it patay nga tawo.
Ginapangabudlayan sigon raya nga madakpan it mga mangingisda ag sa kamatuoran hay maskin magpamunit ag bukon it preska ro paon hay inde haeos magtukob ro isda.
Rason nga uwa it kamatuoran ro nagkalhit nga impormasyon nga ro mga ginabaligya nga isda sa probinsya it Aklan hay nakakaon it patay nga tawo maghalin sa mga narumpag nga pantyon sa nasambit nga lugar.
Nauna eon nga ginklaro it Antique Provincial Disaster Risk Reduction Management Council ag Sebaste Municipal Police Station nga mabuhay eon nga uwa gina-eobngan ro sementeryo nga maeapit sa baybayon bangud nga makapilang beses eon man raya nga tinamaan it storm surge.
