KALIBO, Aklan—Dismayado ro Kabataan Partylist sa hana nga pagpaiway it Barangay ag Sangguniang Kabataan (SK) elections nga nakataeana kunta sa maabot nga Disyembre 5 it presenteng dag-on.
Suno kay Kabataan Partylist representative Raoul Danniel Abellar Manuel, sambilog imaw sa nagboto nga “NO” ukon uwa nagapasugot nga mapaiway it uman ro nakataeana nga eleksyon.
Sa deliberasyon it mga natungdan nga komitiba, ginpahayag ni Manuel nga haom eon ro Commission on Elections ukon Comelec sa pagpatigayon it nasambit nga eleksyon.
Ro ginasugid nga P8 bilyon nga matipid engkaso nga inde madayon ro eleksyon hay ginpahayag sigon it National Citizens’ Movement for Free Elections (NAMFREL) nga magasaka sa P13 bilyon ro pagagastuson it gobyerno kon inde pa pag-ipadayon makaron nga dag-on ro botohan.
Gin-insister dugang ni Manuel nga maabong bakante nga posisyon makaron para sa sangguniang kabataan bangud nga ro mga presenteng opisyal hay uwa eon it oras nga magperform sa andang responsibilidad ag obligasyon.
Sa makaron suno kana hay maabong mga pamatan-on ro gusto nga pun-an ro kakueangan sa SK positions kon siin nagpaidaeom ro mga raya sa training ag nagaplano eon it mga programa ag proyekto para sa andang barangay engkaso nga sanda ro mapilian.
Sa mga masunod nga deliberasyon hay uman sigon nga pamaeabagan it Kabataan Partylist ro hana nga pagpaiway sa nasambit nga eleksyon.
