KALIBO, Aklan—Sa pihak it posibleng pagsueod it La Niña, ginarekomenda sa gihapon it Municipal Disaster Risk Reduction and Management Office ukon MDRRMO ro pagdeklara it state of calamity sa banwa it Kalibo bangud sa epekto it El Niño.
Raya ro ginkumpirma ni MDRRMO-Kalibo head Terrence June Toriano matapos nga may pilang mga barangay ro naapektuhan it grabeng init it tiempo partikular ro kakueangan it suplay it tubi ag sektor it agrikultura.
Ginpahayag dugang nga ro nasambit nga tikang hay gintalakay sa ginpatigayon nga meeting it disaster risk reduction management council .
Sa oras nga maaprubahan it Sangguniang Bayan ro pagdeklara it state of calamity, pwede eon nga magamit it lokal nga gobyerno it kalibo ro andang calamity fund ag posibleng dugang nga pondo halin sa nasyunal para sa response activities sa El Niñio ag pagtau it bulig sa mga apektadong mangunguma ag mangingida kamana man sa pamunuan it Metro Kalibo Water District.
Samtang, bilang catch basin ro banwa it Kalibo, ginpahayag ni Toriano nga padayun ro ginahimo nga pagpahaum it MDRRMO-Kalibo para sa nagahilapit nga tag-uean ag La Niña.
Kaibahan suno kana ro Kalibo sa 30-year flood control project it Asian Development Bank sa tatlong river basin sa pilipinas kaeakip sa sambilog sa Mindanao ag Negros Occidental .
Apang sa makaron hay ginatutukan nanda ro mga mitigating measure kun sa siin prayoridad nanda ro evacuation kaysa sa rescue operation nga hugut nga ginapatuman ro international standard.
Uman imaw nga nag apela sa mga residente partikular sa mga natumod nga flood prone areas sa kalibo nga magkooperar sa mga rescuers ag magsunod eagi sa ginamandu.
Haum eon man sigon ro andang mga rescue assets and equipment eabi eon ro para sa maritime operations ag ro training sa mga personnel sa nagakaigo nga paggamit kara.
