Magapatigayon it simulation exercises ro katapo it kapulisan it Kalibo International Airport Police Station makaron nga adlaw it Sabado bandang alas-2:30 it hapon.
Ginpahayag ni PMaj. Rainer Dollente nga tuyo kara nga makit-an ro kahauman it mga kapulisan sa paeoparan.
Magapasakop sa nasambit nga aktibidad ro mga miyembro it Civil Aviation Authority of the Philippines ukon CAAP fire fighter, personnel ag iba pa.
Ginpahayag dugang ni PMaj. Dollente nga ro aktibad nga igapatigayon hay properly coordinated sa mismong pamunuan it paeoparan kon siin ginpasiguro man kara sa publiko nga inde raya makata-o it sab-eag bangud nga madaling oras eamang ro igabuhay it aktibidad.
Nasayuran nga amat-amat eon nga naga-inabo ro mga pasahero sa Kalibo International Airport matapos nga gindugangan it mga airline companies ro andang flights sa kada adlaw.
