KALIBO, Aklan—Ginpaathag ni Kalibo sangguniang bayan member Augusto Tolentino ro anang parte kon ham-an nga bukon imaw it pabor sa approved resolution ni vice mayor Cynthia Dela Cruz nga bayluhan ro pangaean it Rizal Street sa China Street.
Ginpamilit ni Tolentino nga owa it eamod pamulitika ro anang oposisyon.
Gusto eamang nana nga ipabilin ro presenteng pangaean it kalye bilang pagtau it pasidungog sa pambansang bayani it Pilipinas nga si Dr. Jose Rizal.
Aminado imaw nga maabu nga mga negosyanteng Chinese ro naga-istar dati sa nasambit nga kalye, apang ko mga 1950s ukon 1960s hay nasunog ro lugar rason nga ro pilang mga naga-istar idtu hay nagsaylo it maistaran.
Maskin suno kana ro mga naga-istar sa lugar partikular sa estaka hay bukon it pabor sa plano.
Kadungan kara, ginhangkat it opisyal ro bise alkalde nga magpatawag it public hearing agud nga masayuran ro pulso it publiko.
