KALIBO, Aklan—Ginaduso makaron ni Kalibo sangguniang bayan member Augusto Tolentino nga mataw-an it pagkilaea ro naging effort it Kalibo municipal police station ag ni incoming mayor Juris Sucro sa naging partisipasyon man kara sa madasig nga pagkasolbar it krimen nga nag -eontad sa banwa kon siin ro naging biktima hay ro empleyada it RD pawnshop Mabini St. Kalibo branch nga nasapwan eon lang nga nagapaligos sa anang kaugalingon nga dugo ko Hunyo 6 it presenteng dag-on.
Ginpaathag ni Tolentino nga sambilog man raya sa pamaagi nga maapresyar ro effort it mga otoridad kamana man encouragement sa tanan nga law enforcement agency sa madasig nga pag-aksyon nga mataw-an it hustisya ro krimen.
Madumduman nga sa Brgy. Pinagbuhatan, Pasig City eon nadakpan ro gwardya ag suspek nga si Mark Archie Torrefiel, 31-anyos it Brgy. Cajilo, Makato matapos ro brutal kara nga pagpatay sa biktima nga si Bonna Hercia Ambay, 23-anyos it Brgy. Nauring, Pandan, Antique ag reliever-manager sa nasambit nga pawnshop.
Si Torrefiel hay nakakulong eon makaron sa Bureau of Jail Penology and Management ukon BJMP sa Brgy. Nalook, Kalibo sa kasong Robbery with Homicide.
Samtang, si Ambay hay nakataeana nga igaeobong sa Hunyo 25.
