KALIBO, Aklan—Pabor si Sangguniang Bayan member Augosto Tolentino sa naging tikang nga ginhimu ni Department of the Interior and Local Government (DILG) Secretary Benjamin Abalos Jr. nga maghalin sa pwesto ro mga 3rd level police official it Philippine National Police.
Suno kay Tolentino nga owa dapat sigon it ikahadlok ro sangka opisyal kung owa man raya it ginahimu nga kasae-anan.
Mas mayad pa sigon nga magsumite eon lang it courtesy resignation para mas mapamatud-an nga owa raya naeakot sa ano man nga klase it ilegalidad.
Suno pa kana nga saludo imaw sa mga katapo it kapulisan nga owa it kahadlok nga magasabat sa panawagan it sekretaryo.
Ro nasambit sigon nga courtesy resignation hay ro paglimpyo sa bilog nga hanay it kapulisan para matapna eon ro ilegalidad angot sa ilegal nga droga nga kung siin eakot ro pilang ka mga police officials.
