KALIBO, Aklan—Uwa naging sab-eag sa sangka atleta maghalin sa Brgy. Osman, Malinao ro anang kapansanan agud nga kilaeahon bilang mayad nga swimmer.
Raya ro ginpamatud-an ni Joven Ibuno, sangka amputee ag rotary project walk recipient matapos nga nag uli it kadungganan sa probinsya it Aklan pinaagi sa tatlong ka mga medalyang nakuhit sa patag it swimming sa nagtaliwan nga Palarong Pambansa 2023 nga ginpatigayon sa Marikina City.
Suno kana, ro pagiging positibo sa kabuhi ro nagdaea kana sa hampang agud nga maging Gold medalist sa 50M backstroke; Silver medalist sa 50M freestyle ag Bronze medalist sa 50M backstroke sa Paragames swimming OH sa Palarong Pambansa 2023.
Ginpahayag ni Ibuno nga gusto nana nga makabulig sa anang pamilya maskin nga may kapansanan imaw rason nga nagpursige raya nga magkaantiguhan it pag-eangoy hasta nga naging representante imaw it andang eskwelahan maghalin sa district meet, Western Visayas Regional Athletic ukon WVRAA meet hasta nga nakaabot imaw sa Palarong Pambansa.
Handom sigon nana nga makilaea imaw bukon it sa anang kapansanan kundi sa pagiging mayad nga atleta.
