KALIBO, Aklan—Kapin sa 2,161 ka mga Locally Stranded Individual ukon LSI’s ro nag-aeabutan sa probinsya it Aklan.
Samtang, ro mga Returning Overseas Filipino ukon ROF’s hay masobra sa 500.
Suno kay Provincial Health Officer 1 Dr. Cornelio Cuatchon Jr. it PHO Aklan, kaeabanan kanda hay nakatapos eon it 14 days quarantine period sa gintaeana nga Local Covid Center it tagsa ka mga lokal nga gobyerno sa Aklan samtang ro iba hay naka-home quarantine eamang.
Suno pa kay Dr. Cuatchon, sigidas ro monitoring it mga natungdan nga barangay health emergency response teams ukon bherts agud nga masiguro nga ginasunod ro minimum health protocols kontra sa pagkalhit it Covid-19.
Nasayuran nga ro Aklan hay nakalista eon it kauna-unahang LSI nga nagpositibo sa Covid-19 sa katawuhan it sangka 23 anyos nga daeaga halin sa Cebu City.
Samtang sa pihak nga parte, ginpahayag ni Dr. Cuatchon nga napasa eon nanda ro mga requirements sa dali eon lang matapos nga molecular laboratory nga nahamtang sa compound it Aklan provincial hospital.
Suno kana, naka-initial training eon ro mga staff nga sanda ro magadumaea sa nasambit nga laboratoryo nga ginaeaumang makabulig it mabahoe sa pagpatigayon it swab testing sa mga makabig nga Covid-19 suspects.
