KALIBO, Aklan—Nag-abot sa 40 nga mga indibidwal ro nag-file it Certificates of Candidacy ukon COC para sa 14 nga gintaeana nga posisyon sa provincial level sa nagahilapit nga Mayo 2022 nga eleksyon, base sa datos it Commission on Elections ukon Comelec-Aklan.
Base sa listahan nga ginpaguwa it comelec sa pagpamuno ni Provincial Comelec Supervisor Atty. Roberto Salazar, kabilugan nga 40 nga COCs ro gindihon sa gintaeana nanda nga venue sa aklan catholic college covered gym umpisa Oktubre 1 hasta 8.
Raya hay sa pihak nga 14 eamang nga provincial posts ro kinahangean nga mapun-an sa maabot nga eleksyon.
Nagapakita sa datos nga ap-at ro nag-file it COC para sa pagka-kongresista sa unang distrito samtang tatlo sa ikaywang distrito.
Sa pihak nga parte, may una nga 15 nga aspirante para sa tig-limang slots sa pagka-sangguniang panlalawigan member sa 1st district ag 11 sa 2nd district.
Ap-at man ro nag-file it COC sa pagka-gobernador ag tatlo sa bise gobernador.
Nauna eon nga ginpahayag it comelec nga target nanda nga makapaguwa it listahan it mga kandidato sa pagtapos it dag-on matapos raya nga masaea.
Hasta sa Nobyembre 15 eamang ginapasugtan ro “substitute candidates” halin sa presidente hasta sa konsehal engkaso nga ro orihinal nga kandidato hay maga-withdraw, mamatay ukon ma-disqualify antes ro gintaeana nga deadline.
