Kapin sa 4,000 household sa Barangay Poblacion, Kalibo ro recipient it food assistance nga ginakaeakipan it gatas, bugas, itlog, de lata ag kape nga maghalin sa lokal nga gobyerno it Kalibo.
Suno kay Erly Sayol, municipal social welfare officer III it LGU Kalibo nga daywang adlaw ro gintaeana para sa barangay poblacion sa pagta-o it food packs sa mga pamilyang apektado it grabeng pagbaha ko nagtaliwan nga dominggo.
Ginpaathag ni Sayol nga prayoridad it nasambit nga assistance ro eubusang apektado it pagbaha kon siin ro listahan hay maghalin sa natungdan nga baryo bangud nga ro barangay council ro nagakilaea it mga pumueoyo nga mataw-an it ayuda.
Nauna eon nga nagpaabot it food packs ro gobyerno probinsyal ag ro kongresista it ikaywang distrito sa mga kalibonhon.
Ro nasambit nga food assistance hay maghalin sa calamity fund gobyerno matapos nga ginpaidaeom sa state of calamity ro bilog nga probinsya it Aklan bangud sa halit ag danyos nga gin-aywan it maeapnagon nga pagbaha tuga it pag-inuean.
