KALIBO, Aklan—Hugut nga ginpamalibaran ni Bacan punong barangay Allen Robelo ro reklamo it sangka residente nga si Mrs. Erna Castro nga ginhambaean nana raya nga tagatago it kriminal.
Gin klaru ni kapitan Robelo nga namitlang ro baeay ni Castro it mga pulis nga naga-usoy sa daywang suspek nga nagpanakaw it mountain bike sa banwa it Kalibo rason nga idtu sanda nag-agto.
Natiempo suno kana nga idtu naga istar sa andang likod it baeay ro mga naarestong indibidwal.
Amindo man ro opisyal nga raya eon ro ikatlong kahigayunan nga may nadakpan nga mga kriminal sa andang compound.
Sa pihak nga parte, gindugang pa ni Robelo nga kon minatud-on hay pwede nana nga kasuhan it indirect contempt si Castro bangud sa owa kara pagsipot sa mga summon nga ginapadaea kana.
Owa suno kana imaw nagapamersonal bangud nga may mga complainant kontra kana.
