KALIBO, Aklan — Nag abot eon sa masobra sa 18,000 ro numero it dengue cases sa Western Visayas makaron nga dag-on.
Raya hay base sa datos it Department of Health Western Visayas Center for Health and Development .
Suno kay Dr. Bea Camille Natalaray, Medical Coordinator for the Emerging and Re-emerging Infectious Disease Cluster it ahensya, nakarecord it 2,368 nga bag-ong kaso sa 34th Morbidity Week.
Sa makaron, nakalista it 18,056 nga kabilugan nga kaso nga may 42 nga namatay umpisa ko Enero 1 hasta Agosto 24, 2024.
Sa nasambit nga numero, 11 ro panibag-ong namatay bangud sa sakit.
Nagapabilin nga ro Iloilo ro may pinakamataas nga kaso nga una sa 7,020 ag 20 ro patay; Negros Occidental nga may 2,864 cases ag waeo ro patay; Aklan nga may 2,035 cases ag ap-at ro patay; Capiz nga may 1,828 cases ag lima ro patay; Guimaras nga may 1,446 cases ag sambilog ro patay; Antique nga may 1,012 cases ag sambilog ro patay; Iloilo City nga may 1,118 cases ag ap-at ro patay; Bacolod City nga may 849 cases, ag sambilog ro patay.
Kaeabanan sa apektado hay ro mga indibidwal nga naga-edad it 11 hasta 20 anyos nga nakalista it 6,203 cases.
