KALIBO, Aklan—Nakataeanang pagapasakaan it kasong robbery with homicide pinaagi sa regular filing ro naarestong si Delsol Zonio, Jr., kaibahan ro iba pang suspek sa pagbaril-patay sa kaparehong empleyado it cargo forwarding company nga si Jan Andrei Bolido ko Abril 27, 2024 sa Barangay Dumga, Makato.
Suno kay P/Chief Master Sergeant Josefino Baldomero, chief investigator it Makato Municipal Police Station nga ginapahaum eon makaron it imbestigador sa kaso ro mga nagakaigo nga dokumento para sa pagpasaka it nasambit nga kaso.
Sa oras sigon nga makapaguwa ro korte it warrant of arrest hay pagatugison nanda ro iba pang mga responsable sa krimen.
Madumduman nga pinatay ro 24-anyos nga si Bolido, residente it Barangay Tamalagon, Tangalan samtang nagapasakay sa truck it J&T Express Philippines agud nga magpadaea kunta it kwarta sa sangka remittance center sa Barangay Poblacion, Makato.
Dugang pa ni Baldomero nga maid-id ro andang pag-estudyo sa kaso agud nga makasigurado nga mabakod nga kaso ro igapasaka sa tanan nga mga suspek ag masiguro nga maangkon it biktima ro hustisya.
Sangka slug it kalibre .38 nga baril ro nakita sa eawas it biktima sa ginpatigayon nga autopsy.
Base sa CCTV footage, nakita nga nagpaeagiw ro armadong suspek sa gin-eontaran it krimen sakay sa sangka get-away vehicle nga sangka motorsiklo nga ginamaneho it sangka naka-helmet man nga driver nga nagahueat sa unahan, kun sa siin ag nag-agi sanda sa Dumga diversion road.
Ginatutukan kara nga anggulo ro inside job matapos nga ro 35 anyos nga si Zonio ag ro anang kakunchaba hay gina-alegar nga parehong naga-trabaho sa nasambit nga kompaniya nga naka-assign sa andang branch sa Tigayon, Kalibo.
Hilway sigon nga magsurender sa mga awtoridad ro iba pang person of interest sa kaso.
Sa pihak nga parte, ginpaidaeum eon sa inquest proceeding si zonio sa mga kasong pag-eabag sa reckless driving, resistance and disobedience to an agent of a person in authority matapos nga magpaeagiw sa checkpoint nga gintukod it banga pnp ko Abril 29 ag kasong pag-eabag sa RA 9165 ukon comprehensive dangerous drugs act of 2002 kasunod it narekober nga an-um nga sachet it shabu ag aluminum foil sa sueod it anang gin-abadonang saeakyan sa Barangay Balactasan, Madalag ko Abril 30.
Nabo-oe pa sa posisyon ag kontrol ni Zonio ro kwarta nga masobra sa P23,500, drug paraphernalia ag nagkaeain-eain nga ID kaibahan ro anang ID bilang empleyado it cargo forwarding company.
Nauna eon nga narekober ro motorsiklo nga gingamit sa krimen sa baeay it ginikanan ni Zonio ko Mayo 1 sa Barangay Polo, Banga.
