KALIBO, Aklan—Personal nga nagpaabot it reklamo sa Bombo Radyo ro sangka ginang matapos nga gin-claim it owa eun ginpangaeanan nga persona ro kwarta nga ginpadaea kana it anang ginpautang.
Suno sa tagreklamo nga si Edelyn Abello, nag-ugat ro tanan umpisa nga nag-utang kana it kapin sa P100,000 nga balor it kwarta si Joelyn Pastrana ko petsa 27 it Setyembre ag nag-promisa nga magabayad ko petsa 24 it Nobyembre.
Dokumentado man ro andang transaksyon ag may ginpa-ubrang undertaking sa sangka abogado.
Apang kabaliskaran sa andang ginkasugtanan, nakabatun eamang ro tagreklamo it P30,000 bilang bayad sa anang ginpautang nga kwarta.
Bangud kara, nagparecord sigon imaw sa andang barangay apang sa pagpatawag hay owa nagsapoe si Pastrana.
Gintaw-an it barangay it rekomendasyon nga magfile it kaso nga estafa sa korte apang bangud sa kaeo-oy hay anang ginpamalibaran.
Ginhambaean eon lang sigon kara ro pamilya ni Pastrana nga bayaran eun ro anang utang.
May kaangtanan kara, nakabatun imaw it code maghalin sa Palawan Pawnshop nga may nagpadaea kana it kwarta nga kapin sa P50,000.
Apang bangud kueang gihapon raya agud mabayaran ro anang ginpautang nga P100,000 hay owa nana gin-claim.
Pagkatapos nga ginhambaean it anang abugado, nagdesisyon imaw nga boe-on ro kwarta apang base sa data it nasambit nga remittance center hay na-claim eon raya it sangka persona gamit ro anang pangaean.
Gin-insister man kara nga owa imaw it kapareho it pangaean sa bilog nga probinsya it Aklan.
Nagpanawagan man si Abello sa nag-claim it anang kwarta nga ibalik raya bangud eubos nga kinahangean it anang pamilya eabi eun nga nakulong ro anang asawa.
Raya eun lang man ro andang nabilin nga kita matapos makabaligya it eugta sa Boracay
Samtang, gin-hingyo man it tagreklamo ro kooperasyon it nasambitan nga remittance center.
Dapat sigon nga maghimo it aksyon ro taeatapan sa nasambit nga hitabo.
